KIO Ningbaw Malai, USA Jinghpaw ni hte hkrum

Maigan hkrunlam hkawm nga ai, Wunpawng Mungdan Shanglawt Hpung (KIO) a Ningbaw Malai, Lat Du Daju Jum N’ban La Awng gaw, USA e du nga ai tinang J.W amyusha ni hte mung, hkrum shaga sai re.

KIO Ningbaw Malai gaw USA e du nga tinang amyusha ni hte, Florida mungdaw, Jacksonville e October 23-24, lahkawng ya, KIO hte amyusha shawnglam hte seng nna hkrum bawngban lu sai re.

Maigan hkrunlam hkawm nga ai KIO Ningbaw Malai N'ban La Awng.

Dai zuphpawng hta, KIO a shawnglawm ninggawn mungmasa hte dai hpe USA e du nga ai amyusha ni mung gara hku ta tut shanglawm let, amyusha lawt lam hta maga lit jahpra la na lam ni hpe, azin ayang bawngban hpaji jaw la lu sai lam, Amerikan Jinghpaw shiga lawk hku chye lu ai.

USA Jinghpaw ni hte KIO Ningbaw Malai lapran galaw ai, ndai Florida zuphpawng de Amerikan mungdaw matsat, California, Texas, Mississippi, Louisiana, Nebraska, Illinois hte Maryland de na J.W datkasa ni sa du bawngban shanglawm sai re.

Zuphpawng hta, Ningbaw Malai Dukaba N’ban La hte rau KIO Ginjaw Dinggrin Komiti malawm Dukaba Gawlu La Awng mung, shanglawm ai.

KIO ningbaw yan gaw, seng ang ai Amerikan asuya salang ni hte hkrum na matu, Myen mung na, kaga amyusha myit rum rawtmalan hpung ningbaw nkau hte rau, Amerika de du nga ai lam re.

KIO gaw August 30 ya shani, uhpung a shawnglam ninggawn mungmasa hpe ndau shabra dat sai. Ndau  hta, 1947 ning Panglong Ga Sadi hpe ningpawt let jet ai Munghpawm Myen Mungdan n lu gaw de dingsa, KIA dap hkrang galai na n re lam, ashan sha sanglang tawn ai.

Dai re majaw, Septemberm praw 1 ya shani kaw nna, Myen hpyen asuya hte KIO lapran, salang shada matut hkat ai lam di mat nhtawm, Myen gaw KIO hpe hpyen hku bai masat sai.

Dai zawn re ai aten hte, maga mi de, Myen gaw November praw 7, Ralata Poi galaw na kyin nga ai aten, KIO/KIA a arawng aya kaba dik Ningbaw Malai N’ban La Awng gaw, mungdan shinggan de pru le hkawm ai lam re.